Gün ərzində ölkə ərazisində qeydə alınan 54 cinayətin açılması təmin olunub

03.04.2023

Aprelin 3-də ölkə ərazisində qeydə alınan 54, əvvəlki dövrlərdən bağlı qalan 13 cinayətin açılması daxili işlər orqanlarının əməkdaşları tərəfindən təmin olunub.

Nərimanov rayonu ərazisində sürücünü bıçaqla hədələyib 450 manatını talamaqda şübhəli bilinən Bakı şəhər sakini C.Bağırzadə saxlanılıb

03.04.2023

Aprelin 3-də günorta saatlarında Nərimanov rayonu ərazisində “Toyota” markalı bir avtomobildə sərnişinin sürücünü bıçaqla hədələyib 450 manatını talaması barədə polisə məlumat daxil olub.Nərimanov RPİ 16-cı Polis Bölməsi əməkdaşlarının keçirdikləri əməliyyat tədbiri nəticəsində quldurluq əməlində şübhəli bilinən Bakı şəhər sakini C.Bağırzadə müəyyən olunaraq saxlanılıb.Nərimanov Rayon Polis İdarəsində araşdırma aparılır.

Binəqədi rayonu ərazisində bir qadına qarşı quldurluq etməkdə şübhəli bilinən Ağdam rayon sakini C.Qurbanov saxlanılıb

03.04.2023

Aprelin 1-də saat 20 radələrində Binəqədi rayonu ərazisində bir qadının içərisində pulu olan cüzdanının və  qızıl-zinət əşyalarının quldurluq yolu ilə talanması barədə polisə məlumat daxil olub. Binəqədi RPİ 5-ci Polis Bölməsi əməkdaşlarının keçirdikləri əməliyyat tədbiri nəticəsində quldurluq əməlində şübhəli bilinən Ağdam rayon sakini, əvvəllər məhkum olunmuş C.Qurbanov müəyyən olunaraq saxlanılıb. Araşdırma aparılır. 

Silsilə oğurluq cinayətlərində şübhəli bilinərək saxlanılan X.Şəmsiyevdən heroin aşkar olunaraq götürülüb

03.04.2023

Səbail RPİ 9-cu Polis Bölməsi əməkdaşlarının daxil olan məlumatlar əsasında keçirdikləri əməliyyat tədbirləri nəticəsində müxtəlif vaxtlarda rayon ərazisində 5 nəfərin mobil telefonlarını, 3 nəfərin isə cüzdanlarını oğurlamaqda şübhəli bilinən Sumqayıt şəhər sakini, əvvəllər məhkum olunmuş X.Şəmsiyev müəyyən olunaraq saxlanılıb. Şəxsi axtarış zamanı ondan heroin aşkar olunaraq götürülüb. Araşdırma aparılır. 

Səbail rayonu ərazisində bir qadının çantasını soyğunçuluq yolu ilə talamaqda şübhəli bilinən Bakı şəhər sakini O.İbrahimli saxlanılıb

03.04.2023

Aprelin 2-də Səbail rayonu ərazisində Bakı şəhər sakini olan bir qadının içərisində pulu, sənəd və bank kartı olan çantasının soyğunçuluq yolu ilə talanması barədə polisə məlumat daxil olub. Səbail RPİ 9-cu Polis Bölməsi əməkdaşlarının keçirdikləri əməliyyat tədbiri nəticəsində soyğunçuluq əməlində şübhəli bilinən Bakı şəhər sakini O.İbrahimli müəyyən olunaraq saxlanılıb. Araşdırma aparılır.

Sumqayıt şəhəri ərazisindəki bir qarajdan oğurluq etməkdə şübhəli bilinən şəhər sakini M.Qubatov saxlanılıb

03.04.2023

Sumqayıt ŞPİ 4-cü Polis Bölməsi əməkdaşlarının daxil olan məlumat əsasında keçirdikləri əməliyyat tədbiri nəticəsində şəhər ərazisindəki bir qarajdan 1300 manat dəyərində 2 ədəd velosiped, 1 ədəd kompüter və 1 ədəd qaz sobası oğurlamaqda şübhəli bilinən şəhər sakini, əvvəllər məhkum olunmuş M.Qubatov saxlanılıb. Araşdırma aparılır.

Ağdaş rayonunun Ləki kəndi ərazisində “KamAZ” markalı avtomobil yolun kənarında dayanan eyni markalı digər avtomobilə çırpılıb

03.04.2023

Aprelin 3-də saat 4 radələrində Ağdaş rayonunun Ləki kəndi ərazisində Oğuz rayon sakini E.İsmayılov idarə etdiyi “KamAZ” markalı avtomobili yolun kənarında dayanan “KamAZ” markalı digər avtomobilə vurub. Nəticədə xəsarətlə xəstəxanaya yerləşdirilən E.İsmayılov ölüb. Baş İstintaq və Təhqiqat İdarəsi tərəfindən araşdırma aparılır.

Yevlax rayonunun Aran kəndində “VAZ-21124” və “Mercedes” markalı avtomobillər toqquşub

03.04.2023

Aprelin 3-də saat 14 radələrində Yevlax rayonunun Aran kəndində kənd sakini B.Muradovun idarə etdiyi “VAZ-21124” və Gəncə şəhər sakini V.Məmmədovun idarə etdiyi “Mercedes” markalı avtomobillər toqquşub. Nəticədə B.Muradov hadisə yerində ölüb.Baş İstintaq və Təhqiqat İdarəsi tərəfindən araşdırma aparılır.

Nizami rayonu Babək prospektində “Mercedes” markalı avtomobillə yolu keçən paytaxt sakini N.Həsənov vurulub

03.04.2023

Aprelin 3-də saat 18 radələrində Nizami rayonu Babək prospektində Bakı şəhər sakini A.İsayev idarə etdiyi “Mercedes” markalı avtomobillə yolu keçən paytaxt sakini N.Həsənovu vurub. Nəticədə xəsarətlə xəstəxanaya yerləşdirilən piyada orada ölüb. Nizami Rayon Polis İdarəsində araşdırma aparılır.

Salyan rayonunun Arbatan kəndi ərazisində yol-nəqliyyat hadisəsi

03.04.2023

Aprelin 3-də saat 1 radələrində Salyan rayonunun Arbatan kəndi ərazisində yolu keçən 45-50 yaşlı kişi müəyyən edilməyən avtomobillə vurulub və nəticədə həmin şəxs hadisə yerində ölüb.Əməliyyat-axtarış tədbirləri aparılır.