Xətai rayonunda yerləşən dəmir yolu ərazisində bir nəfərə qarşı quldurluq əməlini törətməkdə şübhəli bilinən N.Abasov və N.Sadiqi müəyyən olunaraq saxlanılıblar

06.05.2024

Xətai rayonunda yerləşən dəmir yolu ərazisində bir nəfər şəxsə qarşı quldurluq əməli törədilməsi barədə polisə məlumat daxil olub. Araşdırmalarla həmin şəxsin döyülməsi, kəsici alətlə xəsarət yetirilərək mobil telefonunun talanması, daha sonra telefonundakı tətbiq vasitəsilə 367 manat dəyərində alış-veriş edilməsi məlum olub.     Ona xəstəxanada ilkin tibbi yardım göstərilib. Nəqliyyatda Baş Polis İdarəsi əməkdaşlarının keçirdikləri tədbirlərlə quldurluq əməlini törətməkdə şübhəli bilinən N.Abasov və N.Sadiqi müəyyən olunaraq saxlanılıb.Araşdırma aparılır.

Qanunsuz saxlanılan odlu silahlar təhvil götürülüb

06.05.2024

Polis əməkdaşları qanunsuz saxlanılan odlu silahların könüllü təhvil verilməsi ilə bağlı profilaktik tədbirləri davam etdirir. Mayın 6-da polis əməkdaşları paytaxt və respublikanın ayrı-ayrı rayonlarında 4 ədəd müxtəlif markalı tüfəng təhvil götürüblər. 

Qanunsuz saxlanılan odlu silah-sursat aşkar edilərək götürülüb

06.05.2024

Qanunsuz saxlanılan odlu silah-sursatın aşkar olunaraq götürülməsi istiqamətində tədbirlər davamlı olaraq həyata keçirilir. Mayın 6-da polis əməkdaşlarının keçirdikləri əməliyyat tədbirləri ilə qanunsuz saxlanılan 1 tapança, 1 qumbara, 2 patron darağı və 18 ədəd patron aşkar edilərək götürülüb. 

Yasamalda taksi sürücülərini dələduzluq edərək aldadan və motosiklet oğurlayan şəxslər saxlanılıblar

06.05.2024

Yasamal rayonunda vətəndaşlardan birinə məxsus dəyəri 3 min manat olan motosikletin naməlum şəxslər tərəfindən oğurlandığı barədə polisə məlumat daxil olub. Yasamal Rayon Polis İdarəsinin 29-cu Polis Şöbəsinin əməkdaşları tərəfindən həyata keçirilən tədbirlər nəticəsində əməli törədən Abşeron rayon sakinləri Nurlan Kərəmov, Kənan Səlimov və  Eltun Nəcəfov saxlanılıblar. Saxlanılanların törətdiyi oğurluq əməli təhlükəsizlik kameraları vasitəsilə də qeydə alınıb. Şöbə əməkdaşlarının həyata keçirdikləri digər tədbir zamanı paytaxt ərazisində taksi sürücülərinə qarşı dələduzluq edərək onların mobil telefon və pul vəsaitlərini ələ keçirən əvvəllər oğurluq, dələduzluq, eləcə də narkotiklərlə bağlı cinayətlərə görə dəfələrlə məhkum olunmuş Anar İmanov saxlanılıb. Onun üzərindən şəxsi istifadəsi üçün əldə etdiyi narkotik vasitə də aşkar olunaraq götürülüb. A.İmanovun paytaxtın müxtəlif ərazilərində taksi sürücülərinə qarşı dələduzluq etdiyi müəyyən edilib. A.İmanov, N.Kərəmov, K.Səlimov və E.Nəcəfov analoji əməllərdə iştiraklarının olub-olmaması araşdırılır. Onların qanunsuz əməllərindən zərərçəkən başqa şəxslər varsa, bu barədə polisə müraciət edə bilərlər.

DİN-in Baş Narkotiklərlə Mübarizə İdarəsi aprel ayında 150 kiloqram narkotik vasitəni dövriyyədən çıxarıb; Narkotiklərin “qara bazar”-da dəyəri 6.5 milyon manatdır

06.05.2024

DİN-in Baş Narkotiklərlə Mübarizə İdarəsinin əməkdaşları tərəfindən aprel ayı ərzində narkotiklərin qanunsuz dövriyyəsinə qarşı paytaxt və bölgələrdə 38 əməliyyat keçirib. Nəticədə 34 nəfər və 2 mütəşəkkil dəstənin üzvü saxlanılıb. Onlardan 6-i ölkə ərazisində narkotiklərin tədarükü ilə məşğul olan əsas şəxslər olub. Əməliyyatlarla “qara bazar”-da dəyəri 6.5 milyon manat olan 150 kiloqram, o cümlədən 87 kiloqram tərkibi psixotrop maddələrlə zənginləşdirilmiş marixuana, 36 kiloqram heroin, 22 kiloqram metamfetamin, 5 kiloqram tiryək və digər növdən olan narkotik vasitə, 5 min ədəd psixotrop tərkibli metadon, tramadol və lirika həbi ələ keçirilib.Araşdırmalarla müəyyən edilib ki, saxlanılan şəxslər şəxsiyyəti istintaqla araşdırılan İran vətəndaşları tərəfindən qanunsuz yollarla ölkəmizə göndərilən narkotikləri maddi qazanc əldə etmək məqsədi ilə ayrı-ayrı şəxslərə çatdırmağı planlaşdırıblar. Faktlarla bağlı cinayət işləri başlanılıb, saxlanılan şəxslər barəsində məhkəmənin qərarı ilə həbs qətimkan tədbiri seçilib. Narkotiklərin qanunsuz dövriyyəsinə qarşı mübarizə tədbirləri respublikanın bütün bölgələrində fasiləsiz olaraq davam etdirilir.

Gün ərzində ölkə ərazisində qeydə alınan 71 cinayətin açılması təmin olunub

05.05.2024

Mayın 5-də ölkə ərazisində qeydə alınan 63, əvvəlki dövrlərdən bağlı qalan 8 cinayətin açılması polis əməkdaşları tərəfindən təmin olunub.

Nərimanov rayonu ərazisində yerləşən mağazaların birindən oğurluq etməkdə şübhəli bilinən S.Bədirov saxlanılıb

05.05.2024

Nərimanov RPİ 18-ci Polis Şöbəsi əməkdaşlarının keçirdikləri tədbirlərlə rayon ərazisində yerləşən mağazaların birindən 2 ədəd mobil telefon oğurlamaqda şübhəli bilinən, əvvəllər də oğurluğa görə məhkum olunmuş S.Bədirov müəyyən olunaraq saxlanılıb. Araşdırma aparılır.

Nəsimi rayonu ərazisində yerləşən parkların birində iki nəfər şəxsin çantalarını oğurlamaqda şübhəli bilinən F.Soltanov saxlanılıb

05.05.2024

Mayın 4-də Nəsimi rayonu ərazisində yerləşən parkların birində iki nəfər şəxsin içərisində mobil telefonları olan çantalarının oğurlanması barədə polisə məlumat daxil olub.Nəsimi RPİ 22-ci Polis Şöbəsi əməkdaşlarının keçirdikləri tədbirlərlə oğurluq əməlində şübhəli bilinən F.Soltanov saxlanılıb. Onun müxtəlif vaxtlarda rayon ərazisində daha bir nəfər şəxsin mobil telefonunu, digər şəxsin isə velosipedini oğurlaması da müəyyən olunub.Araşdırma aparılır. 

Mayın 4-də və 5-də ümumi çəkisi 1,9 kiloqramdan artıq narkotik vasitə aşkar olunaraq götürülüb

05.05.2024

Polis əməkdaşlarının keçirdikləri əməliyyat tədbirləri ilə mayın 4-də və 5-də ümumi çəkisi 1,9 kiloqramdan artıq narkotik vasitə aşkar olunaraq götürülüb.   Qanunsuz dövriyyədən çıxarılan narkotik vasitələr – 1,5 kiloqramdan çox marixuana, 400 qrama yaxın metamfetamin, həmçinin 20 ədəd metadon həbi və 22 ədəd çətənə kolu olub.    Bu istiqamətdə qətiyyətli mübarizə tədbirləri davam etdirilir. 

Gün ərzində ölkə ərazisində qeydə alınan 61 cinayətin açılması təmin olunub

04.05.2024

Mayın 4-də ölkə ərazisində qeydə alınan 56, əvvəlki dövrlərdən bağlı qalan 5 cinayətin açılması polis əməkdaşları tərəfindən təmin olunub.