Turanxeber.az saytının baş redaktoru Güllər Bəhrəmova DİN rəhbərliyinə ünvanladığı minnətdarlıq məktubunda sayta məxsus mənimsənilərək ələ keçirilmiş kameralarının qaytarılmasında göstərdikləri köməkliyə görə Yasamal RPİ 29-cu Polis Şöbəsinin rəhbərliyinə və əməkdaşlarına təşəkkürünü bildirir.

İsmayıllı rayon sakini Sabir Məhərrəmov rayonun Soltankənd tam orta məktəbinin pedaqoji kollektivi adından təhsil müəssisələrində keçirilən maarifləndirmə tədbirlərinə görə Rayon Polis Şöbəsinin rəhbərliyinə və əməkdaşlarına öz minnətdarlığını bildirir.

Ölkəmizə xarici dövlətlərdən gələn turistlərin sayı ildən-ilə artmaqdadır. Hər dəfə onların ölkəmiz haqqında xoş sözlərini, fikirlərini də eşitməyə adət etmişik. İngiltərə vətəndaşı Freddie Fitchesin ölkəmiz barədə dedikləri doğrudan da çox təsirlidir. Xüsusən müəllifin Azərbaycandakı sabitliyə, əmin-amanlığa yüksək dəyər verməsini, hətta bundan ruhlanıb polis peşəsini seçməsini bildirməsi əslində hamımız üçün önəmlidir. Məktubu qısa ixtisarla təqdim edirik:

"Azərbaycan Polisini ürəkdən salamlayıram! Bildirmək istəyirəm ki, mən bu ilin mart ayında məzuniyyətimi Bakı şəhərində çox gözəl bir şəkildə keçirtdim. Burada təşkil olunan Novruz bayramı şənliklərini çox bəyəndim. Həmin tədbirlərdə polis əməkdaşlarının öz xidmətini olduqca təşkilatlanmış bir şəkildə aparmasını, vətəndaşlara və turistlərə qarşı səmimi və mehriban davranış sərgiləməsini görmək çox xoş idi.

Mən həmçinin bəzi yol polisi əməkdaşlarının hərəkətin təhlükəsizliyinin təmin edilməsi üçün necə böyük əmək sərf etmələrinin şahidi oldum. Bu, mənim Bakıya ikinci səfərim idi və demək istəyirəm ki, sizin polisiniz asayişin və təhlükəsizliyin qorunması ilə bağlı vəzifələrinin öhdəsindən layiqincə gəlir. Mən cinayətkarlığın səviyyəsi çox yüksək olan Londonda yaşayıram və burada vətəndaşlar, xüsusilə də gənclər gündəlik həyatlarında müxtəlif təhlükələrlə üzləşirlər. Bakıda isə mən hətta gecə vaxtı özümü tamamilə təhlükəsiz hiss edirdim və anlayıram ki, bu, polis əməkdaşlarının və hökumətin böyük əməyi sayəsində mümkün olmuşdur.

Qeyd etmək istəyirəm ki, mən son bir neçə ildə Bakıda olarkən aldığım təəssüratlar və “Youtube” sosial şəbəkəsində izlədiyim xəbərlər sayəsində Azərbaycan Polisinin böyük pərəstişkarına çevrilmişəm. Bütün rəsmi sosial media səhifələrində Azərbaycan Polisinin fəaliyyətini izləyirəm. Orada deyilənlərin hamısını başa düşməsəm də, polis əməkdaşlarınızın hərəkətlərindən onların yüksək peşəkarlığı görünür. Mən, vətəndaşlarınızın da polis əməkdaşlarına hörmətlə yanaşdığını görürəm. Sizin, polis fəaliyyətinin belə yüksək standartlarını müəyyən etməyiniz möhtəşəmdir, gördüyünüz bütün işlərə görə sizə böyük ehtiram bəsləyirəm.

Azərbaycan Polisi haqqında internetdə və səfərlərim zamanı aldığım təəssüratın nəticəsi olaraq mən bu yaxınlarda Böyük Britaniya Polisində xidmətə qəbul oldum. və Azərbaycan dilini öyrənməyə başlamışam. Mənim həyatıma müsbət təsir göstərdiklərinə görə onlara ürəkdən təşəkkür edirəm. Azərbaycan Polisində xidmət edən hər kəsə: Siz hamınız əla iş görürsünüz. Sükanı belə saxla!

Əminəm ki, gələn il yenidən Bakıya gələcəyəm, çünki artıq Bakı mənim ən sevdiyim şəhərlərdən biridir!

Hörmətlə,

Freddie Fitches"

Bakı şəhər sakini Piri Hacıyev DİN-ə ünvanladığı təşəkkür məktubunda üzləşdiyi problemin operativ şəkildə həll olunmasında göstərdiyi köməkliyə görə Abşeron Rayon Polis İdarəsinin Cinayət-Axtarışı şöbəsinin rəisi Əli Almasova minnətdarlığını ifadə edir.

Bakı şəhər sakini Tural Məmmədov avtomobilinə dəymiş ziyanın ödətdirilməsində göstərdikləri köməkliyə görə həmkarlarımıza təşəkkürünü bildirir.

Ağcabədi rayonunun bir qrup sakini cinayətkar qrup və dəstələrin ifşa edilib zərərsizləşdirilməsində, narkotiklərin qanunsuz dövriyyəsinə qarşı mübarizənin gücləndirilməsində, rayonda yaradılmış sabitliyə, əmin-amanlığa görə DİN rəhbərliyinə və vəzifə borclarının öhdəsindən layiqincə gələn RPŞ-nin əməkdaşlarına xidmətlərində uğurlar arzulayırlar.

Nardaran kənd sakini Kərimova Mərziyənin kənd sakinləri adından DİN-ə ünvanladığı təşəkkür məktubunda bunlar yazılıb: “Mən 1941-ci ildə Nardaran kəndində anadan olmuşam. Bu kəndin acılı günlərini görmüşəm. Hal-hazırda möhtərəm cənab Prezidentimizin ali diqqət və qayğısı sayəsində bu kənd günü-gündən abadlaşır və gözəlləşir. Kəndimizdə əmin-amanlıq və sabitlikdir. Sağ olsun polislər də, onlar asayişin keşiyində ayıq-sayıq dayanırlar. Gənclərimiz də diqqətdən kənarda qalmayıb. Bir zamanlar boş qalan məktəblər indi artıq övladlarımızın nəfəsi ilə isinir.”

Bakı şəhər sakini Həsən Ağayevin DİN-ə ünvanladığı məktubda üzləşdiyi problemin operativ şəkildə həll olunmasında göstərdiyi köməkliyə görə Baş Mütəşəkkil Cinayətkarlıqla Mübarizə İdarəsinin rəhbərliyinə təşəkkürünü bildirir.

Bakı şəhər sakini Nicat Nemətzadə Nəsimi RPİ-nin 22-ci Polis Şöbəsinin əməkdaşı polis kapitanı Anar Allahverdiyevin təhlükəsizliyin təminində göstərdiyi sayıq xidmətini yüksək dəyərləndirir, göstərdiyi peşəkarlığa görə ölkə polisinə minnətdarlığını bildirir.