Xətai rayonunun R.Quliyev küçəsində baş verən yol-nəqliyyat hadisəsi nəticəsində 1 nəfər ölüb, 6 nəfər xəsarət alıb

05.08.2023

Avqustun 5-də saat 11 radələrində Xətai rayonunun R.Quliyev küçəsində Bakı şəhər sakinləri G.Süleymanlının idarə etdiyi “Toyota” və Ə.Səlimlinin idarə etdiyi “Opel” markalı avtomobillər toqquşub və sonradan “Toyota” markalı avtomobil yolu keçən G.Mehdiyevanı, Ü.Nərimanlını və azyaşlı qızını vurub. Nəticədə piyadalar və Ə.Səlimlinin 4 sərnişini xəstəxanaya yerləşdirilib, G.Mehdiyeva avqustun 6-da ölüb.Xətai Rayon Polis İdarəsində araşdırma aparılır.

Gəncə şəhəri ərazisində əcnəbi vətəndaş idarə etdiyi avtomobili yolun kənarındakı ağaca vurub

05.08.2023

Avqustun 5-də saat 3 radələrində Gəncə şəhəri ərazisində əcnəbi vətəndaş idarə etdiyi “Toyota” markalı avtomobili yolun kənarındakı ağaca vurub. Nəticədə avtomobildəki sərnişin, Şəmkir rayon sakini E.Abdullayev hadisə yerində ölüb, sürücü və digər 2 sərnişin xəstəxanaya yerləşdirilib, onlardan A.Lətifova orada ölüb.Gəncə Şəhər Baş Polis İdarəsində araşdırma aparılır.

Ötən gün Abşeron rayonunda polisin keçirdiyi profilaktik tədbirlər zamanı cinayət və inzibati xarakterli ümumilikdə 1710 fakt aşkar olunub

05.08.2023

Abşeron Rayon Polis İdarəsi və ərazi üzrə polis bölmələri avqustun 4-də hüquqpozmalara qarşı növbəti dəfə gücləndirilmiş əməliyyat-profilaktiki tədbirlər keçiriblər.Tədbirlər çərçivəsində Abşeron Rayon Polis İdarəsinin Qobu Polis Bölməsinin əməkdaşları tərəfindən, əvvəllər məhkum olunmuş Ramil Hüseynov Hökməli qəsəbəsi ərazisində saxlanılıb. Onun üzərindən 1 ədəd “Kalaşnikov” markalı avtomat, 1 ədəd daraq və 6 ədəd patron aşkar edilib. Mehdiabad Polis Bölməsinin əməkdaşları tərəfindən həyata keçirilən əməliyyat zamanı da üzərində qanunsuz olaraq odlu silah gəzdirən əvvəllər məhkum olunmuş Fərman Muradov saxlanılıb. Ondan 1 ədəd “Kalaşnikov” markalı avtomat, 1 ədəd patron darağı və 7 ədəd patron aşkar edilib.Abşeron Rayon Polis İdarəsinin Saray Polis Bölməsinin əməkdaşları tərəfindən həyata keçirilən  əməliyyat zamanı da üzərində qanunsuz olaraq odlu silah saxlayan Absət Abdullayev və Novxanı qəsəbəsində narkotiklərin qanunsuz dövriyyəsi təşkil edən əvvəllər məhkum olunmuş Balabəy Ağadadaşov da saxlanılıblar. Onlardan 1 ədəd “TT” markalı tapança,  8 ədəd patron və 1 kiloqramdan artıq heroin aşkar edilib. Abşeron Rayon Polis İdarəsinin Cinayət Axtarışı Şöbəsinin əməkdaşlarının həyata keçirdikləri əməliyyat nəticəsində saxlanılan əvvəllər dəfələrlə məhkum olunmuş Şahmar Sadiqovdan 1 ədəd “Kalaşnikov” avtomatı, 1 ədəd daraq və 9 ədəd patron aşkar edilib. Digər əməliyyat zamanı  Abşeron rayonunda silsilə oğurluqlar və müxtəlif növ cinayət törətdiklərinə görə axtarışda olan 9, “isti izlərlə” cinayətin açılması üzrə 30,  narkotiklə əlaqəli cinayətlərə görə 9 nəfər saxlanılıb. Ötən gün Abşeron rayonunda keçirilən əməliyyat-profilaktiki tədbirlər zamanı qanunsuz küçə ticarəti, avaralıq və dilənçiliklə bağlı 82, xırda xuliqanlığa və xırda talamaya görə 30 fakt aşkarlanıb, mülki axtarışda olan 27 nəfər tapılaraq aidiyyəti üzrə təhvil verilib. Bununla yanaşı, yol hərəkəti qaydalarını pozan 105 sürücü inzibati məsuliyyətə cəlb edilib. Avtomobilinə əlavə avadanlıqlar quraşdıran, sərxoş vəziyyərdə və narkotik vasitənin təsiri altında sükan arxasında əyləşən, konstruksiya dəyişikliyi edən 18 sürücü müəyyən edilib, dayanma-durma qaydalarının pozulmasına görə 196 fakt üzrə protokol tərtib olunub. Ötən gün Abşeron rayonunda polisin keçirdiyi profilaktik tədbirlər zamanı cinayət və inzibati xarakterli ümumilikdə 1710 fakt aşkar olunub. 

Gün ərzində ölkə ərazisində qeydə alınan 85 cinayətin açılması təmin olunub

04.08.2023

Avqustun  4-də ölkə ərazisində qeydə alınan 85, əvvəlki dövrlərdən bağlı qalan 31 cinayətin açılması daxili işlər orqanlarının əməkdaşları tərəfindən təmin olunub.

Polis əməkdaşlarının sayıqlığı və operativliyi ilə ödəmə terminalından oğurluğa cəhd göstərən şəxs saxlanılıb

04.08.2023

Avqustun 4-də gecə saat 4 radələrində Qaradağ rayonunun Sahil qəsəbəsi ərazisindəki marketlərin birində quraşdırılan ödəmə terminalından oğurluğa cəhd göstərən şəxs Qaradağ Rayon Mühafizə İdarəsinin əməkdaşları tərəfindən saxlanılıb. Onun Göyçay rayon sakini H.Nağıyev olması məlum olub və 38-ci Polis Bölməsinə təhvil verilib. Polis Bölməsində aparılan araşdırmalarla onun həmin gün səhər saatlarında Sahil qəsəbəsi ərazisində yerləşən bir lombarddan oğurluğa cəhd göstərməsi də müəyyən olunub.

Axtarışda olan Sumqayıt şəhər sakini N.Hüseynovdan şəxsi axtarış zamanı heroin və metamfetamin aşkar olunaraq götürülüb

04.08.2023

Metropolitendə Polis İdarəsinin əməkdaşları tərəfindən görülən tədbirlərlə borclu qismində axtarışda olan Sumqayıt şəhər sakini N.Hüseynov saxlanılıb. Şəxsi axtarış zamanı ondan heroin və metamfetamin aşkar olunaraq götürülüb. Araşdırma aparılır. 

Oğurluq əməlini törətməkdə şübhəli bilinən 39 yaşlı bir qadın və iki yeniyetmə müəyyən olunaraq saxlanılıblar

04.08.2023

Avqustun 3-də Binəqədi qəsəbəsi ərazisində “Mercedes” markalı bir avtomobilin saxlanc yerindən 20.848 manat pulun oğurlanması barədə polisə məlumat daxil olub.Binəqədi RPİ 43-cü Polis Bölməsi əməkdaşlarının keçirdikləri əməliyyat tədbiri nəticəsində oğurluq əməlini törətməkdə şübhəli bilinən 39 yaşlı bir qadın və iki yeniyetmə müəyyən olunaraq saxlanılıblar. Araşdırma aparılır. 

Restoranların birindən 1650 manat pul oğurlamaqda şübhəli bilinən paytaxt sakini Ü.Mənsimov saxlanılıb

04.08.2023

Sabunçu RPİ 13-cü Polis Bölməsi əməkdaşlarının keçirdikləri əməliyyat tədbiri nəticəsində iyulun 31-də Bakıxanov qəsəbəsi ərazisində yerləşən restoranların birindən 1650 manat pul oğurlamaqda şübhəli bilinən paytaxt sakini Ü.Mənsimov saxlanılıb. Araşdırma aparılır. 

Oğurluqda şübhəli bilinən Masallı rayon sakini K.Məhərrəmov, Salyan rayon sakini R.Abdullayev və Sumqayıt şəhər sakini olan bir yeniyetmə müəyyən olunaraq saxlanılıblar

04.08.2023

Sabunçu RPİ 42-ci Polis Bölməsi əməkdaşlarının keçirdikləri əməliyyat tədbiri nəticəsində avqustun 1-də Bakı şəhər sakini olan bir qadının içərisində pulu, bank kartları, sənədləri və 3000 manat dəyərində mobil telefonu olan çantasını oğurlamaqda şübhəli bilinən Masallı rayon sakini K.Məhərrəmov, Salyan rayon sakini R.Abdullayev və Sumqayıt şəhər sakini olan bir yeniyetmə müəyyən olunaraq saxlanılıblar. Araşdırma aparılır. 

Mənzillərin birindən pul və qızıl-zinət əşyaları oğurlamaqda şübhəli bilinən Ağdaş rayon sakini Ə.Rəhimov saxlanılıb

04.08.2023

Nəsimi RPİ 19-cu Polis Şöbəsi əməkdaşlarının keçirdikləri əməliyyat tədbiri nəticəsində avqustun 3-də rayon ərazisindəki mənzillərin birindən pul və qızıl-zinət əşyaları oğurlamaqda şübhəli bilinən Ağdaş rayon sakini, əvvəllər məhkum olunmuş Ə.Rəhimov saxlanılıb. Araşdırmalarla onun daha iki evdən pul və qızıl-zinət əşyaları oğurlaması da müəyyən olunub.