Pirotexniki vasitələrin topdan satışını həyata keçirən şəxslərin saxlanılması istiqamətində paytaxt və bölgələrdə eyni anda əməliyyatlar keçirilib

31.12.2021

Polis əməkdaşları tərəfindən partlayıcı, tezalışan maddələrin, pirotexniki vasitələrin paytaxt ərazisində topdan satışının qarşısının alınması istiqamətində ölkəboyu daha bir genişmiqyaslı əməliyyat keçirilib.Belə ki, bir qrup şəxsin külli miqdarda pirotexniki vasitələri qaçaqmalçılıq yolu ilə ölkə ərazisinə gətirərək “Sədərək” Ticarət mərkəzində və digər ərazilərdə gizli şəkildə topdansatışını təşkil etmələri barədə daxili işlər orqanlarına əməliyyat məlumatı daxil olub. Həmin şəxslərin əhatə dairəsi və əlaqələri qısa zamanda dəqiqləşdirilib. Paytaxtın Xəzər, Qaradağ, eləcə də Ağstafa və Qazax rayonlarında həyata keçirilən əməliyyatlar zamanı mütəşəkkil dəstənin başçısı Elçin Kazımov, üzvləri Şəmməd Şəmmədov, Anar Süleymanov və pirotexniki vasitələrin satışını təşkil edən Camal Əliyevlə qardaşı Cavad saxlanılıblar. Bu şəxslərin ticarət mərkəzində yerləşən obyektlərinə, avtomobillərinə, həmçinin Ağstafa və Xəzər rayonunda yerləşən anbar kimi istifadə etdikləri saxlanc yerlərinə qanunvericiliklə nəzərdə tutulmuş qaydada baxış keçirilən zaman ölkə ərazisinə qaçaqmalçılıq yolu ilə gətirdikləri külli miqdarda pirotexniki vasitələr aşkar edilib. Qeyd edək ki, dəstə üzvləri paytaxt və ölkə ərazisinə bu maddələrin paylanılmasını, həmçinin satışını təşkil edən əsas şəxslər olublar. Onlar ifadələrində pirotexniki vasitələri qaçaqmalçılıq yolu ilə ölkə ərazisinə gətirərək satışı ilə məşğul olduqlarını etiraf ediblər. Faktla bağlı dəstə üzvləri barəsində Cinayət Məcəlləsinin müvafiq maddəsi ilə cinayət işi başlanılıb, Onlar barəsində məhkəmənin qərarı ilə həbs qətimkan tədbiri seçilib. Bu istiqamətdə tədbirlər davam etdirilir. Saxlanılan şəxslərdən aşkar olunan pirotexniki vasitələrin qara bazarda satış qiyməti 150 min manatdan artıq olub. Xatırladaq ki, tezalışan maddələr və pirotexniki vasitələrdən istifadə bayram əhval-ruhiyyəsinin, rahatlığının pozulması ilə nəticələnməklə yanaşı, insanların sağlamlığına və ətraf mühitə qarşı da ciddi təhlükədir. Xüsusən də uşaqların əyləncə məqsədi ilə istifadə etdikləri bu vasitələr onlarda ağır göz yaralanmalarına, qalıcı eşitmə qüsurlarına, müxtəlif dərəcəli yanıqlara yol aça bilər. 

Gün ərzində törədilmiş 23 cinayətin üstü “isti izlər”lə açılmışdır

30.12.2021

Respublikanın daxili işlər orqanları tərəfindən gün ərzində törədilmiş 23 cinayətin üstü “isti izlər”lə açılmışdır.

Narkotik vasitələrin təsiri altında avtomobil idarə edən şəxslər saxlanılıb

30.12.2021

DİN-in Baş Dövlət Yol Polisi İdarəsi əməkdaşlarının Şəmkir rayonu və Müşfiqabad qəsəbəsi ərazilərində yerləşən stasionar postlarda keçirdikləri tədbirlərlə narkotik vasitələrin təsiri altında avtomobil idarə edən şəxslər müəyyən edilərək saxlanılıb.  Şəmkir rayonu ərazisində yerləşən stasionar postda Sumqayıt şəhər sakini Yaqub Qəniyevin idarə etdiyi “Mercedes”, Müşfiqabad qəsəbəsi ərazisində yerləşən stasionar postda Kamal Sadıqovun idarə etdiyi “Saturun” markalı avtomobillər nəzarət-yoxlama qaydasında saxlanılıblar. Polis əməkdaşları tərəfindən həmin sürücülərin narkotik vasitə qəbul etmələri müəyyən edilib. İnzibati Xətalar Məcəlləsinin 333.1-ci maddəsilə onların barəsində protokollar tərtib olunub. Şəmkir rayon məhkəməsinin qərarı ilə Y.Qəniyev 400 manat məbləğində cərimələnib. Abşeron rayon məhkəməsinin qərarı ilə K.Sadıqov 6 ay müddətinə sürücülük hüququndan məhrum edilib.Bu istiqamətdə tədbirlər davam etdirilir.

Koronavirus xəstəsi ictimai yerdə aşkar edilərək saxlanılıb

30.12.2021

Dekabrın 30-da polis əməkdaşları tərəfindən respublika ərazisində 2 nəfər aktiv koronavirus xəstəsi ictimai yerdə aşkar edilərək saxlanılıb. Polis əməkdaşları "COVİD-19" virusuna yoluxaraq ev şəraitində müalicədə olmasına baxmayaraq yaşadığı evi tərk etmiş həmin şəxslə izahedici söhbətlər aparıb, tibbi prosedurları gözləməklə yaşadığı evə qaytarıb və bu barədə müvafiq səhiyyə qurumları məlumatlandırılıb.Ev şəraitində müalicə təyin edilməsinə baxmayaraq, yaşayış yerini tərk edən 4 nəfər barəsində isə Cinayət Məcəlləsinin 139-1.1 (epidemiya əleyhinə və karantin rejimlərinin pozulması) maddəsi ilə cinayət işi başlanılıb.

Sumqayıt şəhər sakini C.Quliyevin pulunu açıq talama yolu ilə aparmaqda şübhəli bilinən S.Ruhullazadə saxlanılmışdır

30.12.2021

Sumqayıt ŞPİ 1-ci Polis Bölməsinə dekabrın 30-na keçən gecə 10-cu mikrorayonun ərazisində bir nəfərin şəhər sakini C.Quliyevin 350 manat pulunu açıq talama yolu ilə aparması barədə məlumat daxil olmuşdur.Polis əməkdaşlarının keçirdikləri əməliyyat-axtarış tədbirləri nəticəsində soyğunçuluğu törətməkdə şübhəli bilinən şəhər sakini S.Ruhullazadə saxlanılmışdır. Sumqayıt ŞPİ tərəfindən araşdırma aparılır. 

Quba şəhəri ərazisində yerləşən avto-yuma məntəqəsindən “Jeep” markalı avtomobili qaçırmaqda şübhəli bilinən B.Şıxverdiyev saxlanılmışdır

30.12.2021

Quba RPŞ-yə dekabrın 30-da şəhər ərazisində yerləşən avto-yuma məntəqəsində işləyən B.Şıxverdiyevin oradan “Jeep” markalı avtomobili qaçırıb, Amsar kəndi ərazisində ağaca vuraraq yol-nəqliyyat hadisəsi törətməsi barədə məlumat daxil olmuşdur.  Polis əməkdaşlarının keçirdikləri əməliyyat-axtarış tədbirləri nəticəsində nəqliyyat vasitəsini qaçırmaqda şübhəli bilinən B.Şıxverdiyev saxlanılmışdır.Quba RPŞ tərəfindən araşdırma aparılır. 

Binəqədi rayonunun Biləcəri qəsəbəsi ərazisində “QAZel” markalı avtomobil maneəyə çırpılmışdır

30.12.2021

Dekabrın 30-da saat 17 radələrində Binəqədi rayonunun Biləcəri qəsəbəsi ərazisində Cəbrayıl rayon sakini Nazim Quliyev idarə etdiyi “QAZel” markalı avtomobili maneəyə vurmuşdur. Nəticədə sürücü aldığı xəsarətlərdən hadisə yerində ölmüşdür. Binəqədi RPİ tərəfindən araşdırma aparılır.

Paytaxt sakini C.Salmanovun idarə etdiyi avtomobillə paytaxt sakini Ə.Nuruşov vurulmuşdur

30.12.2021

Dekabrın 31-də saat 1 radələrində 8 Noyabr prospektində paytaxt sakini C.Salmanov idarə etdiyi “KİA” markalı avtomobili ilə yolu keçən paytaxt sakini Əli Nuruşovu vurmuşdur. Nəticədə piyada aldığı xəsarətlərdən hadisə yerində ölmüşdür.Xətai RPİ tərəfindən araşdırma aparılır. 

Sabunçu rayonu ərazisindəki evlərin birindən pul və qızıl-zinət əşyaları oğurlamaqda şübhəli bilinən paytaxt sakini X.Tağıyeva saxlanılmışdır

30.12.2021

Sabunçu RPİ 13-cü Polis Bölməsi və Nizami RPİ 25-ci Polis Şöbəsi əməkdaşlarının birgə keçirdikləri əməliyyat-axtarış tədbirləri nəticəsində Sabunçu rayonu ərazisindəki evlərin birindən 720 manat pul və 5000 manat dəyərində qızıl-zinət əşyaları oğurlamaqda şübhəli bilinən paytaxt sakini X.Tağıyeva saxlanılmışdır.

Paytaxt sakini T.Babayevaya məxsus çantanı soyğunçuluq yolu ilə almaqda şübhəli bilinən O.Əliyev saxlanılmışdır

30.12.2021

Nizami RPİ 25-ci Polis Şöbəsi  əməkdaşlarının keçirdikləri əməliyyat-axtarış tədbiri nəticəsində T.Babayevaya məxsus içərisində 20 manat pul, bank kartları və ev açarları olan çantanı soyğunçuluq yolu ilə almaqda şübhəli bilinən paytaxt sakini, əvvəllər məhkum olunmuş O.Əliyev saxlanılmışdır.