Sabunçu və Nizami rayonlarının ərazisində köşk və mağazalarda yetkinlik yaşına çatmayanlara tütün məmulatının satılması faktları aşkar edilmişdir

10.06.2019

Polis orqanları tərəfindən yetkinlik yaşına çatmayanlara alkoqollu içkilərin və tütün məmulatlarının satışının qarşısının alınması istiqamətində mütəmadi olaraq tədbirlər keçirilir.

İyunun 10-da DİN-in Baş İctimai Təhlükəsizlik,  Sabunçu və Nizami Rayon Polis idarələri əməkdaşlarının qeyd olunan rayonların ərazisində keçirdikləri reydlər nəticəsində köşk və mağazalarda satıcıların  yetkinlik yaşına çatmayanlara tütün məmulatı satması faktları aşkar edilmişdir.

Sabunçu rayonu ərazisində 4, Nizami rayonu ərazisində isə 2 köşk və mağazanın satıcıları barəsində İnzibati Xətalar Məcəlləsinin 455.2-ci maddəsinə əsasən (Etil (yeyinti) spirti, alkoqollu içkilərin və ya tütün məmulatlarının yetkinlik yaşına çatmayanlara satılmasına görə) protokol tərtib olunmuşdur.

Bu istiqamətdə reydlər davam etdirilir.