Avtomaşın oğurluğu ilə məşğul olan qrup tutulmuşdur

07.05.2008

Nərimanov RPİ 17-ci PB əməkdaşlarının keçirdikləri əməliyyat tədbirləri nəticəsində martın 30-da Saleh Babayevə, aprelin 29-da Rasim Kərimova, mayın 6-da isə Səlahəddin Ələkbərova məxsus avtomaşınları qaçırmış Bakı şəhər sakinləri Samir Abdullayev və Əli Əhmədov tutulmuşdur. Ətraflarında aparılmış əməliyyat tədbirləri nəticəsində müəyyən edilmişdir ki, onlar aprel və may ayları ərzində ayrı-ayrı vətəndaşlara məxsus daha 2 avtomobili qaçırmaları, habelə Bakı şəhər sakini İbadulla Şıxıyevə məxsus «VAZ-2101» markalı avtomaşından isə şüşəni sındırmaq yolu ilə akkumlyator və 2 ədəd səsgücləndiricini oğurlamaları, eləcə də R.Kərimova məxsus avtomaşının qaçırılmasında Bakı şəhər sakini Zaur Fətullayevlə birgə iştirak etmələri müəyyən edilmiş, Z.Fətullayev tutulmuşdur.