Tovuz şəhəri ərazisində əvvəllər məhkum olunmuş F.Ələkbərliyə münaqişə zəminində odlu silahdan açdığı atəşlə xəsarət yetirmiş Ə.Şəmiyev könüllü olaraq istintaqa təslim olmuşdur

13.09.2019

Sentyabrın 13-də saat 9 radələrində Tovuz şəhəri ərazisində Qədirli kənd sakini, əvvəllər məhkum olunmuş Firuddin Ələkbərlinin işlədiyi ofisə gəlmiş Yanıqlı kənd sakini Əli Şəmiyev münaqişə zəminində odlu silahdan açdığı atəşlə ona xəsarət yetirmişdir.

Ə.Şəmiyev könüllü olaraq Tovuz Rayon Polis Şöbəsinə gələrək istintaqa təslim olmuş, cinayəti törədərkən istifadə etdiyi “Makarov” markalı tapançanı və 16 ədəd patronu təhvil vermişdir.

Xəstəxanaya yerləşdirilmiş F.Ələkbərli orada ölmüşdür.

Faktla əlaqədar rayon prokurorluğunda Cinayət Məcəlləsinin 120-ci (Qəsdən adam öldürmə) və 228-ci (Qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddələri ilə cinayət işi başlanmışdır.

Zəruri istintaq-əməliyyat tədbirləri həyata keçirilir.