Qaradağ rayonu ərazisində avtomobillə yol hərəkəti qaydasını pozduğuna görə saxlanılarkən polis əməkdaşlarının “saxla” əmrinə tabe olmayan "Kamaz" markalı avtomobilin sürücüsü Q.Bayramov nəqliyyat vasitəsini idarə etmək hüququ 1 il müddətinə məhdudlaşdırılmaqla 20 gün müddətinə inzibati həbs edilmişdir

14.04.2020

Aprelin 13-də Qaradağ rayonu ərazisində Qobustan rayon sakini Q.Bayramov idarə etdiyi “KamAZ” markalı avtomobillə yol hərəkəti qaydasını pozduğuna görə (yolun əks istiqamətində hərəkət etdiyinə görə) həmin ərazidə xidmət aparan polis əməkdaşları tərəfindən verilmiş “saxla” əmrinə tabe olmayıb hərəkətini davam etdirmişdir. Lakin o, polis əməkdaşları tərəfindən saxlanılmışdır.

Qaradağ rayon məhkəməsi tərəfindən İnzibati Xətalar Məcəlləsinin 211 (epidemiya əleyhinə rejimin, sanitariya-gigiyena və karantin rejimlərinin pozulması), 327 (nəqliyyat vasitələrinin sürücüləri tərəfindən yol hərəkəti qaydalarının pozulması), 511 (avtoxuliqanlıq) və 34-cü (bir neçə inzibati xəta törədildikdə, inzibati tənbeh tətbiq etmə) maddələri ilə sürücü Q.Bayramov nəqliyyat vasitəsini idarə etmək hüququ 1 il müddətinə məhdudlaşdırılmaqla 20 gün müddətinə inzibati həbs edilmişdir.