Ağstafa RPŞ və Dövlət Sərhəd Xidməti əməkdaşlarının daxil olmuş məlumat əsasında birgə keçirdikləri əməliyyat-axtarış tədbiri nəticəsində Sadıqlı kənd sakini S.Namazovun kənd ərazisində yaşayış olmayan tikilidə saxladığı 6 kiloqram 205 qram heroin aşkar edilərək götürülmüşdür.

Şəmkir RPŞ əməkdaşlarının daxil olmuş məlumat əsasında keçirdikləri əməliyyat-axtarış tədbiri nəticəsində Bakı şəhər sakini V.Vahidova məxsus “VAZ-2107” markalı avtomobilə baxış zamanı sərnişini - Şəmkir şəhər sakini F.Bağırova məxsus “Browning” markalı tapança aşkar edilərək götürülmüşdür.

Yanvarın 24-də saat 1 radələrində Xəzər rayonunun Mərdəkan qəsəbəsi ərazisində Bakı şəhər sakini Ə.Həsənzadə idarə etdiyi “Range Rover” markalı avtomobili yolun kənarında dayanmış paytaxt sakinləri A.Bağırova məxsus “Mercedes” və N.Rzayevə məxsus “Daewoo” markalı avtomobillərə vurmuşdur. Nəticədə Ə.Həsənzadə aldığı xəsarətlərdən hadisə yerində ölmüş, A.Bağırov xəstəxanaya yerləşdirilmişdir.
Xəzər RPİ tərəfindən araşdırma aparılır.

Respublikanın daxili işlər orqanları tərəfindən, gün ərzində törədilmiş 28 cinayətin üstü “isti izlər”lə açılmışdır.  

• Əvvəlki dövrlərdən bağlı qalmış 7 cinayətin açılması təmin olunmuşdur.    
• Axtarışda olduğuna görə ümumilikdə 23 nəfər, o cümlədən mülki-hüquqi öhdəliklərin icrasından yayındığına görə 1 nəfər, borclu şəxs qismində axtarışda olan 15 nəfər saxlanılaraq aidiyyəti üzrə təhvil verilmişdir.
• Respublikanın avtomobil yollarında 2 yol-nəqliyyat hadisəsi baş vermiş, nəticədə 2 nəfər ölmüş, 1 nəfər xəsarət almışdır.   
• Daxili işlər orqanları əməkdaşlarının həyata keçirdikləri əməliyyat-axtarış tədbirləri nəticəsində narkotiklərlə əlaqəli 15, qanunsuz saxlanılan silah-sursatla bağlı 2 fakt müəyyən edilmişdir.
• Cinayət törətməkdə şübhəli bilinən 32 nəfər saxlanılmışdır.

Yanvarın 23-də saat 15 radələrində Yasamal rayonunun Tbilisi prospektində Sumqayıt şəhər sakini A.Hacıyev idarə etdiyi “İsuzu” markalı avtomobillə yolu keçən Bakı şəhər sakini H.Qurbanovanı vurmuşdur. Nəticədə piyada aldığı xəsarətlərdən hadisə yerində ölmüşdür.
Yasamal RPİ tərəfindən araşdırma aparılır.

Nəqliyyatda Baş Polis İdarəsi əməkdaşlarının daxil olmuş məlumat əsasında Sabunçu dəmir yolu stansiyasının ərazisində keçirdikləri əməliyyat-axtarış tədbirləri nəticəsində Bakı şəhər sakini, əvvəllər məhkum olunmuş G.Məmmədovdan “AKSU” markalı avtomat, 1 ədəd patron darağı, 63 ədəd patron və 2 qrama yaxın marixuana aşkar edilərək götürülmüşdür.

Sabunçu RPİ 13-cü PB əməkdaşlarının keçirdikləri əməliyyat-axtarış tədbirləri nəticəsində yanvarın 15-da E.Şibiyevə məxsus “Kuba Dragon” markalı mopedi oğurlamaqda şübhəli bilinən Şəki şəhər sakini E.Rəhimov saxlanılmışdır.

Kəpəz RPİ əməkdaşlarının keçirdikləri əməliyyat-axtarış tədbirləri nəticəsində yanvarın 22-də rayon ərazisindəki mağazaların birindən 600 manat pul oğurlamaqda şübhəli bilinən Gəncə şəhər sakini İ.İbrahimov saxlanılmışdır.
Ətrafında aparılmış əməliyyat tədbirləri ilə onun daha bir mağazadan 850 manat pul və 560 manat dəyərində ət oğurlaması da müəyyən edilmişdir.

Şirvan ŞPŞ əməkdaşlarının keçirdikləri əməliyyat-axtarış tədbirləri nəticəsində yanvarın 22-də rayon ərazisindəki mağazaların birindən 2650 manat dəyərində ətriyyat və bir kafedən 179 manat dəyərində ərzaq məhsulları oğurlamaqda şübhəli bilinən şəhər sakinləri E.Səməndərli və S.Əlizadə saxlanılmışlar.

Qusar RPŞ əməkdaşlarının daxil olmuş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən şəhər sakini A.Balakişiyev saxlanılmışdır. Şəxsi axtarış zamanı ondan 2 qrama yaxın, yaşadığı evə baxış zamanı isə 7 qramdan artıq marixuana aşkar edilərək götürülmüşdür.

Ətrafında aparılmış əməliyyat tədbirləri ilə onun həmyerlisi, əvvəllər məhkum olunmuş Z.Seyidəhmədovla birgə 2020-ci il dekabrın 19-na keçən gecə şəhər ərazisində Yasab kənd sakini E.Rəfiyevə məxsus “VAZ-2106” markalı avtomobildən oğurluq etmələri də müəyyən edilmişdir.