İdarə etdiyi avtomaşınla piyadanı vuraraq hadisə yerindən qaçırmış sürücü tutulmuşdur

01.08.2008

   Avqustun 1-də saat 21.00 radələrində Ağcabədi rayonundakı M.Ə.Rəsulzadə küçəsində, müəyyən edilməmiş avtomaşınla rayon sakini Haşım Talıbov vurulmuşdur. Həmin avtomaşının sürücüsü, xəsarət almış H.Talıbovu avtomaşına mindirib naməlum istiqamətə aparmışdır. Ağcabədi-Hindarx yolunun 5-ci km-də, sürücü H.Talıbovu avtomaşından düşürtmüş, avtomaşını isə Pərioğullar-Təzəkənd yolunda qoyaraq qaçmışdır. Polis əməkdaşları tərəfindən tapılaraq xəstəxanaya aparılmış H.Talıbov orada ölmüşdür. Ağcabədi RPŞ əməkdaşlarının keçirdikləri əməliyyat tədbirləri nəticəsində hadisəni törətmiş "VAZ-2103" markalı avtomaşının sürücüsü, rayon sakini Allahverdi Əliyev tutulmuşdur. RPŞ tərəfindən araşdırmalar aparılır.