"Asiya" markalı avtomaşının yük yerindən dövlət qeydiyyat nişanları olmayan "Mercedes" markalı avtomaşın aşkar edilmişdir

20.10.2008

Sentyabrın 20-nə keçən gecə Samux RPŞ əməkdaşları tərəfindən qoşqusunda "VAZ-2106" markalı avtomaşın olan "Asiya" markalı avtomaşın saxlanmışdır. Avtomaşının yük yerinə baxış zamanı orada dövlət qeydiyyat nişanları olmayan "Mercedes" markalı avtomaşın aşkar edilmişdir. "VAZ-2106" markalı avtomaşının sürücüsü hadisə yerindən qaçmışdır. "Asiya" markalı avtomaşının sürücüsü, Gəncə şəhər sakini Tariyel İsgəndərov verdiyi izahatda "Mercedes" markalı avtomaşının Tatlı kənd sakini Mətləb Səfərova məxsus həyətdən götürdüyünü bildirmişdir. M.Səfərovun həyətinə baxış zamanı dövlət qeydiyyat nişanları olmayan digər "Mercedes" markalı avtomaşın aşkar edilmişdir. RPŞ əməkdaşlarının keçirdikləri əməliyyat-axtarış tədbirləri nəticəsində Mətləb Səfərovun həyətində aşkar edilmiş avtomaşınların Yevlax rayon sakini Elşad Həsənova məxsus olması və onun Gəncə şəhər  sakini Seymur Verdiyev tərəfindən dələduzluq yolu ilə ələ keçirilməsi müəyyən edilmişdir. S.Verdiyevin ətrafında aparılmış əməliyyat tədbirləri nəticəsində onun cari ilin iyun ayında Gəncə şəhər sakini Rövşən Şahnəzərov və Bərdə rayon sakini Raqub Əkbərovla birgə, Gəncə şəhər sakinləri Sahib Zeynalovun və Elnur Allahverdiyevin etimadlarını qazanaraq onlara  məxsus "Mercedes" markalı avtomaşınları ələ keçirmələri müəyyən edilmişdir. Faktla əlaqədar cinayət işi başlanmışdır.