Binəqədi rayon sakini Vasif Nəsibovdan qanunsuz saxladığı odlu silah və narkotik vasitələr aşkar edilərək götürülmüşdür

20.03.2006

Baş Narkotiklərlə Mübarizə İdarəsi əməkdaşlarının keçirdikləri əməliyyat tədbirləri nəticəsində, Binəqədi rayonu ərazisində, M.Rəsulzadə qəsəbəsində yaşayan Vasif Nəsibovdan 25,551 qram heroin, 1 ədəd "Makarov" tipli pnevmatik tapança, 4 ədəd patron, 1 ədəd patron darağı və 1102 dollar pul götürülmüşdür. V.Nəsibovun idarə etdiyi "Hyndai-Sonata" markalı avtomaşına baxış zamanı 1 ədəd "Vinçester" markalı ov tüfəngi, 30 ədəd patron, 3 ədəd bıçaq, 1 ədəd qandal, 9 ədəd fişəng patronu, 1 ədəd fişəng atmaq üçün alət, 1 ədəd V.Nəsibovun adına Baş Narkotiklərlə Mübarizə İdarəsinin xüsusilə mühüm işlər üzrə əməliyyat müvəkkili yazılmış saxta vəsiqə, 2 ədəd DİN-in Xüsusi Həkim Komissiyasının Tibb Müayinəsinə göndəriş üçün Xanlar rayon Baş Dövlət Yanğın Təhlükəsizliyi Xidmətinə aid olan möhürlənmiş və imzalanmış boş blanklar, 1 ədəd Svetlana Mahmudovaya məxsus şəxsiyyət vəsiqəsi və 2 ədəd DİN-in Dövlət Yanğın Təhlükəsizliyi Xidmətinə aid möhürlər vurulmuş boş vərəqələr aşkar edilərək götürülmüşdür. V.Nəsibova narkotik maddəni 400 dollara satmış Bakı şəhər sakini, əvvəllər məhkum olunmuş Üzeyir Səmədov tutulmuşdur. Ondan əlavə 0,238 qram heroin götürülmüşdür. V.Nəsibov evində gizlətdiyi 62,193 qram heroini könüllü olaraq polisə təhvil vermişdir.