Respublikanın daxili işlər orqanları tərəfindən, gün ərzində törədilmiş 45 cinayətin üstü “isti izlər”lə açılmışdır.  

• Əvvəlki dövrlərdən bağlı qalmış 15 cinayətin açılması təmin olunmuşdur.    
• Axtarışda olduğuna görə ümumilikdə 21 nəfər, o cümlədən borclu şəxs qismində axtarışda olan 15 nəfər saxlanılaraq aidiyyəti üzrə təhvil verilmişdir.
• Respublikanın avtomobil yollarında 2 yol-nəqliyyat hadisəsi baş vermiş, nəticədə 3 nəfər ölmüş, 2 nəfər xəsarət almışdır.   
• Daxili işlər orqanları əməkdaşlarının həyata keçirdikləri əməliyyat-axtarış tədbirləri nəticəsində narkotiklərlə əlaqəli 32, qanunsuz saxlanılan silah-sursatla bağlı 4 fakt müəyyən edilmişdir.
• Cinayət törətməkdə şübhəli bilinən 47 nəfər saxlanılmışdır.

Yanvarın 17-də saat 21 radələrində Cəlilabad rayonunun Təzəkənd kəndi ərazisində Günəşli kənd sakini V.Həsənov idarə etdiyi “VAZ-2121” markalı avtomobili aşırmışdır. Nəticədə sürücü və sərnişini S.Vəliyeva hadisə yerində ölmüş, digər 2 sərnişini xəstəxanaya yerləşdirilmişlər.
Cəlilabad RPŞ tərəfindən araşdırma aparılır.

Yanvarın 17-də saat 19 radələrində Qusar rayonunun Piral kəndi ərazisində kənd sakini R.Sarıxanov idarə etdiyi “Dnepr” markalı motosikleti dərəyə aşırmış və o, aldığı xəsarətlərdən hadisə yerində ölmüşdür.
Qusar RPŞ tərəfindən araşdırma aparılır.

Baş Mütəşəkkil Cinayətkarlıqla Mübarizə İdarəsi əməkdaşlarının əldə edilmiş məlumat əsasında keçirdikləri əməliyyat-axtarış tədbiri nəticəsində Şəmkir rayonu ərazisində Mahmudlu kənd sakini S.Əsədovdan “Makarov” markalı tapança və 1 ədəd patron darağı aşkar edilərək götürülmüşdür.

Baş Narkotiklərlə Mübarizə İdarəsi əməkdaşlarının daxil olmuş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Bakı şəhər sakini M.Əsədov Sabunçu rayonu ərazisində saxlanılmışdır. Şəxsi axtarış zamanı ondan 53 qram, Bakıxanov qəsəbəsindəki evindən isə 515 qram heroin, 505 qram metamfetamin və 1 ədəd elektron tərəzi aşkar edilərək götürülmüşdür.

Baş Narkotiklərlə Mübarizə İdarəsinin Cənub Bölgəsində Regional Şöbəsi əməkdaşlarının daxil olmuş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Bakı şəhər sakini, əvvəllər məhkum olunmuş B.Əliyev Lənkəran şəhəri ərazisində saxlanılmışdır. Şəxsi axtarış zamanı ondan 500 qram heroin aşkar edilərək götürülmüşdür.

Narkotik vasitə ilə tutulmuş A.Məmmədovun ətrafında Nəqliyyatda Baş Polis İdarəsinin əməkdaşları tərəfindən aparılmış əməliyyat tədbirləri ilə onun Qazax şəhəri ərazisində torpağa basdırdığı “AKM” markalı silah və 4 ədəd patron aşkar edilərək götürülmüşdür.

Nəqliyyatda Baş Polis İdarəsi əməkdaşlarının əldə edilmiş məlumat əsasında keçirdikləri əməliyyat-axtarış tədbiri nəticəsində Bülbülə dəmir yolu stansiyası ərazisində Bakı şəhər sakini, əvvəllər məhkum olunmuş Ş.Sadıxovdan “Makarov” markalı tapança, 1 ədəd patron darağı və 3 ədəd patron aşkar edilərək götürülmüşdür.

Binəqədi RPİ 40-cı PB əməkdaşlarının keçirdikləri əməliyyat-axtarış tədbirləri nəticəsində yanvarın 16-da Masallı rayon sakini  Ə.Səmədovun və Sədərək rayon sakini Ə.Rzayevin pullarını və geyim əşyalarını oğurlamaqda, Ə.Rzayevin oğlunun mobil telefonunu isə quldurluq yolu ilə almaqda şübhəli bilinən Masallı rayon sakini, əvvəllər məhkum olunmuş K.Ağayev saxlanılmışdır.

Sabunçu RPİ əməkdaşlarının əldə edilmiş məlumat əsasında keçirdikləri əməliyyat-axtarış tədbiri nəticəsində Bakıxanov qəsəbə sakini, əvvəllər məhkum olunmuş A.Balakişiyevin evinin zirzəmisinə baxış zamanı oradan nömrəsi silinmiş “AKMS” markalı silah, 1 ədəd patron darağı və 4 ədəd patron aşkar edilərək götürülmüşdür.