Azərbaycan Respublikası Daxili İşlər Nazirliyi

Press-relizlər Kriminal xronika Məlumatlar
Gün ərzində 83 cinayət faktı qeydə alınıb
14 dekabr 2017

Respublikanın daxili işlər orqanları tərəfindən gün ərzində 83 cinayət faktı qeydə alınıb, onların da 11-i “isti izlər”lə açılıb. 

  • Axtarışda olduğuna görə 21 nəfər tutularaq aidiyyatı üzrə təhvil verilib. 
  • Respublikanın avtomobil yollarında 3 yol-nəqliyyat hadisəsi baş verib, nəticədə 1 nəfər ölüb, 2 nəfər xəsarət alıb.  
  • Daxili işlər orqanları əməkdaşlarının həyata keçirdikləri əməliyyat-axtarış tədbirləri nəticəsində narkotiklərlə əlaqəli 4 fakt müəyyən edilib. 
  • Cinayət törətməkdə şübhəli bilinən 18 nəfər saxlanılıb.

Ağdaş şəhər sakini Ətraf Nəsibovu qətlə yetirməkdə şübhəli bilinən Tərlan Hacıyev tutulub
14 dekabr 2017

Dekabrın 14-də saat 10 radələrində Ağdaş şəhər sakini Ətraf Nəsibov kəsilmiş-deşilmiş xəsarətlə xəstəxanaya gətirilmiş və orada ölmüşdür.

Rayon Polis Şöbəsi və Prokurorluğu əməkdaşlarının keçirdikləri istintaq-əməliyyat tədbirləri ilə  hadisənin rayon sakini Tərlan Hacıyev tərəfindən münaqişə zəminində törədilməsi müəyyən edilmişdir.   

Ağdaş RPŞ  əməkdaşlarının keçirdikləri təxirəsalınmaz əməliyyat-axtarış tədbirləri nəticəsində qətli törətməkdə şübhəli bilinən T.Hacıyev Qəbələ rayonu ərazisində saxlanılaraq istintaqa təhvil verilib.

Hadisəni törədərkən istifadə etdiyi bıçaq maddi sübut kimi onun üzərindən götürülüb. 

Araşdırma aparılır. 

İçərisində 100 000 manat olan seyfi oğurlamaqda şübhəli bilinən Xəzər rayon sakinləri Bayram Əsgərov və Heydərəli Hacıyev saxlanılıb
14 dekabr 2017

Daxili işlər orqanlarının əməkdaşları tərəfindən mülkiyyət əleyhinə olan cinayətlərlə mübarizə sahəsində növbəti uğurlu əməliyyat tədbiri keçirilib.

Belə ki, dekabrın 13-də Bakı şəhər sakini İlqar Həziyev Xəzər Rayon Polis İdarəsinin 2-ci Polis Bölməsinə məlumat verərək Albalılıq yeni yaşayış sahəsində yerləşən fərdi yaşayış evinin dəmir barmaqlıqlarının qırıldığını və mənzildən  içərisində 100.000 manat olan seyfin oğurlandığını bildirib.

Bakı Şəhər Baş Polis İdarəsi və Xəzər RPİ əməkdaşları tərəfindən “isti izlərlə” və peşəkarlıqla keçirilən istintaq-əməliyyat tədbirləri nəticəsində qeyd edilən cinayətin Xəzər rayon sakinləri Bayram Əsgərov və Heydərəli Hacıyev tərəfindən törədildiyi müəyyən edilib. Polis əməkdaşlarının keçirdikləri əməliyyat-axtarış tədbirləri nəticəsində həmin şəxslər saxlanılaraq istintaqa təhvil veriliblər. 

Cinayəti törətməkdə şübhəli bilinən şəxslərin üzərlərindən və yaşadıqları evlərdən oğurladıqları pullar aşkar olunaraq maddi sübut kimi götürülüb.

Faktla bağlı Xəzər RPİ-nin İstintaq şöbəsində Cinayət Məcəlləsinin müvafiq maddələri ilə cinayət işi başlanılıb, zəruri istintaq hərəkətləri, eləcə də təxirəsalınmaz əməliyyat-axtarış tədbirləri davam etdirilir.

Oğurluqda şübhəli bilinən Bakı şəhər sakini Ənvər Hüseynov saxlanılmışdır
14 dekabr 2017

Sabunçu RPİ 14-cü PB əməkdaşlarının keçirdikləri əməliyyat-axtarış tədbirləri nəticəsində dekabrın 11-də rayon ərazisindəki evlərin birindən 4300 manat, 80 ABŞ dolları və 500 lari, habelə qızıl və gümüş əşyalar oğurlamaqda şübhəli bilinən Bakı şəhər sakini Ənvər Hüseynov saxlanılmışdır.

Qızıl əşyalar oğurlamaqda şübhəli bilinən Cəlilabad şəhər sakini Ənvər Zamanlı saxlanılmışdır
14 dekabr 2017

Cəlilabad RPŞ əməkdaşlarının keçirdikləri əməliyyat-axtarış tədbirləri nəticəsində dekabrın 12-də rayon ərazisindəki evlərin birindən qızıl əşyalar oğurlamaqda şübhəli bilinən şəhər sakini Ənvər Zamanlı saxlanılmışdır. Ətrafında aparılan əməliyyat tədbirləri ilə onun daha 1 evdən 3000 manat və 2 ədəd mobil telefon oğurlaması da müəyyən edilmişdir.

Oğurluqda şübhəli bilinən Pirallahı qəsəbə sakini Sergey Qarbunov saxlanılmışdır
14 dekabr 2017

Dekabrın 13-də Xəzər rayonu ərazisindəki evlərin birindən 170 manat və 100 ABŞ dolları oğurlamaqda şübhəli bilinən Pirallahı qəsəbə sakini Sergey Qarbunov Xəzər RPİ  2-ci PB-nin əməkdaşları tərəfindən saxlanılmışdır.

Avtomobildən akkumulyator oğurlamaqda şübhəli bilinən paytaxt sakini Zaur Əhmədov saxlanılmışdır
14 dekabr 2017

Bakı şəhər sakini Vüsal Qasımova məxsus avtomobildən akkumulyator oğurlamaqda şübhəli bilinən paytaxt sakini Zaur Əhmədov Binəqədi RPİ 6-cı PB-nin əməkdaşları tərəfindən saxlanılmışdır.





Çap et  Çap et