Azərbaycan Respublikası Daxili İşlər Nazirliyi

İdman həyatı


DİN-in İdman Cəmiyyəti, Azərbaycanda dinamo hərəkatının özəyi olmaqla, yarandığı gündən hüquq mühafizə orqanları əməkdaşlarının fiziki hazırlığının təkmilləşdirilməsində, ölkədə idmanın inkişafında, sağlam gənc nəslin formalaşdırılmasında, respublikamızın dünyanın idman ölkələrindən biri kimi tanınmasında böyük rol oynamış, Olimpiya oyunlarında və digər mötəbər idman tədbirlərində dövlətimizin şərəfini layiqincə qoruyan dünya şöhrətli idmançılar yetişdirmişdir.
Ümumilli lider Heydər Əliyevin xalqın təkidli tələbi ilə yenidən ali hakimiyyətə qayıdışından sonra bütün sahələrə artan diqqət və qayğıdan idmana da böyük pay düşdü. Ölkə gənclərinə artan dövlət qayğısı onların cəmiyyətdə özünütəsdiq və potensiallarını reallaşdırmaq imkanlarını daha da genişləndirdi. Azərbaycan gəncliyinin artan uğurları sırasında onların dünyanın idman meydançalarında qazandığı daha əzəmətli və möhtəşəm qələbələr idman tariximizin şanlı səhifələrinə çevrildi. Bu nailiyyətlərin əldə edilməsində DİN-in İdman Cəmiyyətinin yetirmələrinin, əsas vəzifəsi cinayətkarlıqla mübarizə olan polis əməkdaşlarının da böyük rolu var.

Azərbaycanın idman həyatında 90 ildən artıq dövr ərzində şərəflə xidmət edən DİN-in İdman Cəmiyyətinin sıralarında 2 nəfər Azərbaycan Respublikasının  Milli Qəhrəmanı, 7 nəfər Azərbaycan Respublikasının “Şöhrət” ordeni və 10 nəfər “Tərəqqi “ medalı Dövlət mükafatçısı, 5 nəfər Sovet İttifaqı Qəhrəmanı, 2 nəfər Sosialist Əməyi Qəhrəmanı, 1 nəfər SSRİ-nin təyyarəçi-kosmonavtı, 1 nəfər SSRİ xalq artisti, 1 nəfər Azərbaycanın Elmlər Akademiyasının müxbir üzvü, 5 nəfər professor, 4 nəfər elmlər doktoru, 22 nəfər  elmlər namizədi, 3 nəfər SSRİ Yazıçılar birliyinin üzvü, 11 nəfər Əməkdar idman xadimi, 21 nəfər fəxri bədən tərbiyəsi və idman işçisi, habelə 20 nəfər əməkdar, 33 nəfər beynəlxalq dərəcəli idman ustası,  45 nəfər əməkdar məşqçi  və yüzlərlə tanınmış ziyalı vardır. 

Cəmiyyət fəaliyyət göstərdiyi bütün bu dövr ərzində sözün əsl mənasında idman fədailəri: güləşçilər İbrahimpaşa və Müxtar Dadaşovlar, Fikrət Tahirov, Emin Ramazanov, Rafiq Hacıyev, Məmməd İbrahimov, Yaqub Məmmədov, Rəhim İsmayılov, Mustafa Orucov, Sabir Hüseynov, Xəzər İsayev, Namiq Abdullayev, cüdoçular Nazim Hüseynov, Elnur Məmmədli, Mövlud Mirəliyev, Sahib İsmayılov, Tərlan Poladov, boksçular Abbas Ağalarov, Nadir Abbasov, Rauf Cabarov, Fuad Aslanov, Əli İsmayılov, yüngül atletlər Əfqan Səfərov, Xandadaş və Baladadaş Mədətovlar, Ziba Ələsgərova, Aleksandr Kornelyuk, agır atletlər Əhməd Məmmədoğlu, Şirxan Ağayev, stend atıcıları Hafiz Cəfərov, Zemfira Meftaxetdinova, güllə atıcısı İradə Aşumova, qılıncoynadanlar Ənvər Sadıqov, Samir İbrahimov, İlqar Məmmədov, Yaşar Məmmədov, Oktay Şahverdiyev, Boris Koretski, avarçəkənlər Vasiliy Yakuşa, Viktor Perevezov, Gennadiy Kquyskiy, Aleksandr Lukyanov, stolüstü tennisçi Valentina Popova və digərləri öz parlaq qələbələri ilə Azərbaycanın idman salnaməsində yeni səhifələr açmışdır.

Bu illər ərzində dinamo hərəkatının fəal üzvləri ölkə ictimaiyətinin bütün təbəqələrində təmsil olunmaqla yanaşı onun həyatında baş verən ictimai, siyasi proseslərdə də yaxından iştirak edərək Azərbaycan dövlətçiliyinə sədaqətlə xidmət etmiş, həm ikinci Dünya müharibəsi illərində bəşəriyyətin faşizmlə mübarizəsində, həm də dövlətimizin ərazi bütövlüyü və torpaqlarımızın azadlığı uğrunda gedən mübarizədə əsl qəhrəmanlıq və şücaət nümayiş etdirmişlər. Onlardan Sovet İttifaqı Qəhrəmanları: Səlaəddin Kazımovun, Nəcəfqulu Rəfiyevin, Mehdi Quliyevin, Xəlil Məmmədovun, qəhramanlığına görə 7 dəfə xarici dövlətlərin orden və medalları ilə təltif olunmuş Mirdamət Seyidovun; Azərbaycanın Milli Qəhrəmanları: Qarabağ uğrunda döyüşlərdə şəhid olmuş polis baş leytenantı mərhum İlqar İsmayılovun və hazırda Dövlət Təhlükəsizlik Xidmətinin rəisi vəzifəsində xidmət edən general Mədət Quliyevin adlarını qeyd etmək olar.
Müstəqillik illərində sıralarında 4 Olimpiya çempionu, 5 mükafatçısını, onlarla dünya və Avropa çempionları yetirmiş DİN-in İdman Cəmiyyətində daxili işlər orqanlarının şəxsi heyətinin fiziki hazırlığının güc, dözümlük kimi xüsusi keyfiyyətlərinin artırılması və sağlamlığının qorunması başlıca fəaliyyət istiqamətlərindən biri kimi daim diqqət mərkəzindədir. Bu məqsədlə İdman Cəmiyyətinin əməkdaşları vaxtaşırı ərazi polis orqanları və hissələrdə olur, əlbəyaxa döyüş, fiziki hazırlıq üzrə təlimlər keçirirlər. Vaxtaşırı keçirilən DİN-in çempionatlarında ayrı-ayrı idman növləri üzrə ən yaxşı nəticə göstərən əməkdaşlar müəyyən edilir.

Sıralarımızda xidmət edən Olimpiya çempionları – DİN-in DQBİ-nin İdman komandasının rəisi, polis polkovniki Namiq Abdullayevin, DİN-in İdman Cəmiyyətinin sədri, polis polkovniki Zemfira Meftaxetdinovanın, Olimpiya Oyunlarının mükafatçılarından Şəmkir RPŞ-nin əməkdaşı, polis mayoru Mövlud Mirəliyevin, Nərimanov RPİ-nin əməkdaşı, polis polkovnik-leytenantı, idmanın sambo növü üzrə yeddiqat dünya çempionu Ceyhun Məmmədovun, DİN-in İdman Cəmiyyətinin Gəncə şəhər regional qurumunun əməkdaşı, polis kapitanı, dördqat dünya çempionu Hakim Nəzərəliyevin zəngin və şərəfli idman yolu gənc idmançı əməkdaşlarımız üçün nümunədir.
Özündə 50 minə yaxın üzvü birləşdirən və idmanın 22 növü üzrə ixtisaslaşan İdman Cəmiyyəti beynəlxalq əlaqələr çərçivəsində 2008-ci ildən MDB, Baltikyanı, habelə İtaliya, Bolqarıstan, Rumuniya və Anqola kimi ölkələrin aidiyyəti idman təşkilatlarının daxil olduğu Dinamo təşkilatlarının  Beynəlxalq Koordinasiya Şurasına müşahidəçi qismində qoşulmuş, 2013-cü ildən etibarən isə həmin təşkilatın tamhüquqlu üzvü kimi fəal iştirakçısıdır.

Hazırda Azərbaycan Respublikasının Prezidenti, Zati-aliləri hörmətli İlham Əliyev cənablarının rəhbərliyi ilə ölkəmizdə geniş vüsət alan idman hərəkatı və hörmətli nazirimiz cənab Ramil Usubov tərəfindən DİN-in İdman Cəmiyyətinə göstərilən doğma münasibət, yüksək diqqət və qayğı idmançılarımzı yeni-yeni zirvələr fəth etməyə sövq edir.
Öz fəaliyyətində Azərbaycan idmanının şanlı ənənələrini yaşadan və buna öz tövhələrini verən DİN-in İdman Cəmiyyətinin yetirmələri bundan sonra da ölkə idmanının şöhrətini daim uca tutaraq yeni-yeni qələbə raportları ilə həmvətənlərimizi sevindirmək əzmindədir.

 
2014-cü ildə DİO əməkdaşlarının əldə etdikləri uğurlar

2016-cı ildə DİO əməkdaşlarının əldə etdikləri uğurlar




Çap et  Çap et