Aprelin 3-də Azərbaycan Respublikasının daxili işlər naziri, general-polkovnik Ramil Usubov ölkəmizdə səfərdə olan Türkiyə Silahlı Qüvvələrinin Baş Qərargah rəisi, ordu generalı Necdet Özel ilə görüşmüşdür.
Qonağı səmimiyyətlə salamlayan nazir Ramil Usubov dövlət müstəqilliyini əldə etdikdən sonra ölkəmizin qazandığı ən böyük dəyərlər sırasında qardaş Türkiyə ilə əlaqələrin inkişafını önə çəkmiş, ümummilli lider Heydər Əliyevin bu sahədəki xidmətlərini, onun "Bir milət, iki dövlət" siyəsətinin dövlətmizin başçısı cənab İlham Əliyev tərəfindən uğurla həyata keçirildiyini xatırlatmışdır.
Daxili işlər naziri iki dost və qardaş ölkənin daxili işlər orqanları arasında mövcud olan işgüzar əlaqələrdən, Türkiyə Jandarm Komandanlığının Azərbaycan Daxili İşlər Nazirliyinin Daxili Qoşunlarına göstərdiyi maddi-texniki yardımdan, kadr hazırlığı sahəsindəki rolundan bəhs etmiş, qonağın bundan öncə Türkiyə Jandarm Quvvələrinin Baş Komandanı vəzifəsində çalışdığı zaman sözügedən məsələyə xüsusi həssaslıqla və diqqətlə yanaşmasını məmnunluqla xatırladaraq göstərilən hərtərəfli dəstəyə və yardıma görə Türkiyə tərəfinə, şəxsən cənab Necdet Özelə minnətdarlığını bildirmişdir.
Cənab Ramil Usubov bu səfərin əlaqələrimizin inkişafına təkan verəcəyinə, iki qardaş dövlətin müvafiq qurumları arasında əməkdaşlığın potensial imkanlarından bundan sonra da səmərəli istifadə olunacağına əminliyini ifadə etmişdir.
Daha sonra nazir kriminogen durum barədə qısa məlumat vermiş, Azərbaycan Respublikasının Prezidenti cənab İlham Əliyevin rəhbərliyi altında ölkəmizin son illərdəki sürətli inkişafını şərtləndirən əsas amillərdən olan sabitliyin yaradıldığını və dönməzliyinin təmin olunduğunu, bunun ilk növbədə vətəndaşlarımızın, həmçinin  əcnəbilərin təhlükəsiz, əmin-amanlıq şəraitində yaşayıb fəaliyyət göstərmələrinə, külli miqdarda xarici sərmayənin Azərbaycan iqtisadiyyatına qoyulmasına əlverişli şərait yaratdığını diqqətə çatdırmışdır.
Problemlərə toxunan cənab Ramil Usubov transmilli mütəşəkkil cinayətkarlığın bütün forma və təzahürlərirnə, o cümlədən terrorçuluq, narkotiklərin  qanunsuz dövriyyəsi, qeyri-qanuni miqrasiya və insan alveri ilə yalnız birgə səylərlə mübarizə aparılmasının mümkünlüyünü vurğulamışdır.
Türkiyə Silahlı Qüvvələrinin Baş Qərargah rəisi, ordu generalı Necdet Özel dost və qardaş Azərbaycanda yenidən olduğundan məmnunluğunu bildirmiş, iki ölkənin aidiyyatı orqanları, o cümlədən Silahlı Qüvvələrin müvafiq qurumları arasındakı faydalı işbirliyini yüksək qiymətləndirmiş və bu əlaqələrin inkişafı üçün bundan sonra da səylərini  əsirgəməyəcəyini qeyd etmişdir.
Görüşdə Türkiyənin ölkəmizdəki fövqəladə və səlahiyyətli səfiri Alpər Coşqun iştirak etmişdir.